ورفعنا لک ذکرک: تحریر: عرفان ولی

Spread the love

ورفعنا لک ذکرک:
تحریر: عرفان ولی

حالیہ دنوں سوشل میڈیا پہ ایک ویڈیو وائرل ہورہی ہے۔۔۔جس میں ایک نوجوان نعت پڑھ رہا ہے۔۔۔ یہ نعت وطن عزیز کے مشہور نعت خواں ” قاری وحید ظفر قاسمی ” نے پڑھی تھی۔۔۔اور شہرت پائی تھی۔۔۔۔اب دوبارہ اس نوجوان نے انتہائی سادہ۔۔۔اور شیریں لہجے میں پڑھی ۔۔۔۔ اس کی آواز میں اللہ تعالی نے ایسی مٹھاس ڈالی ہے کہ جو بھی ایک دفعہ سنتا ہے۔۔۔۔وہ ان کی آواز کی تعریف کئے بنا نہیں رہ سکتا۔۔
لوگ سمجھتے ہیں کہ اس نوجوان کو شہرت اس کی آواز کی چاشنی سے ملی ہے۔۔۔۔ ممکن ہے۔۔۔ایسا ہوا ہوگا۔۔۔۔ہر شخص کی سوچ کا زاویہ مختلف ہوتا ہے۔۔۔مگر میرے کانوں میں فورا "سورة الم نشرح ” کی آیت نمبر چار گونجنے لگی۔۔۔۔ اللہ تعالی کا ارشاد پاک ہے ” ورفعنا لک ذکرک ” اے پیغمبر ہم نے آپ کے تذکرے کو بلند کردیا۔۔ میرا ایمان ہے۔۔۔کہ اللہ رب العزت نے تمام انبیاء میں سے رسول اللہ ﷺ کو چن کر ان مقام و مرتبہ بلند کردیا ۔۔۔۔اور اعلان کردیا کہ اے پیغمبر ہم نے آپ کی خاطر آپ کے تذکرے بلند کردئیے۔۔۔۔ میرا اس پہ بھی ایمان ہے کہ جو بھی مسلمان خلوص دل سے رسول اللہ ﷺ سے محبت و عقیدت رکھے۔۔۔اور اس کا اظہار کرے۔۔۔اللہ پاک اس کو بھی بلندیاں عطا کرتے ہیں۔۔۔۔۔ مذکورہ نوجون اس کی زندہ مثال ہے۔۔۔
چودہ سو سالہ تاریخ گواہ ہے۔۔۔۔ جس نے بھی میرے حضور ﷺ سے عقیدت رکھی۔۔۔۔محبت رکھی۔۔۔۔ حضور ﷺ کی سنت کو اپنایا۔۔۔اللہ تعالی نے اسے عروج عطا کیا ہے۔۔۔
ذرا سوچئے۔۔۔۔ صرف زبان سے تذکرہ مصطفی ﷺ پہ اتنا مقام مل جاتا ہے۔۔۔۔ تو سوچئے جن کا اوڑھنا بچھونا سنت رسول ہو۔۔۔۔ جن کی سانسوں میں حضور ﷺ بستے ہوں۔۔۔۔ جن کی رگوں میں خون کی جگہ حضور ﷺ کی محبت و عقیدت بہتی ہو۔۔۔۔ جن کے جسم میں جان نبی پاک ﷺ سے تعلق کی امانت ہو۔۔۔ ان کو اللہ پاک کیا مقام عطا کریں گے ؟
میں نے دیکھاکہ سوشل میڈیا پہ راتوں رات اس لڑکے کو شہرت ملی۔۔۔۔ محبت ملی۔۔۔۔ اس نوجوان کو بھی سوچنا چاہئے کہ اصل عزت ” دین اسلام ” میں ہے۔۔۔حضور ﷺ کا امتی بن کر ان سے محبت کرنے میں ہے۔۔۔ اگر یہ لڑکا کوئی گانا گاتا۔۔۔۔تو شاید اتنی شہرت حاصل نہ ہوتی۔۔۔ اتنی عزت افزائی نہیں ہوتی۔۔۔
ان سطروں کو لکھنے کا مقصد بس صرف اتنا سا ہے کہ میں آج اپنے نوجوانوں کو دعوت فکر دینا چاہتا ہوں کہ آؤ۔۔۔۔ نبی ﷺ سے محبت کریں۔۔۔نبی ﷺ کی سنتوں کو عام کریں۔۔۔۔ زبانی محبت رسول کے دعوی کی بجائے عملی طور پہ محبت و عقیدت کا اظہار کریں۔۔۔پھر دیکھیں کہ ” محبت رسول ﷺ ” اپنا کیسا رنگ دکھاتی ہے۔۔۔

” نقش قدم نبی ﷺ کے ہیں جنت راستے "
” اللہ سے ملاتے ہیں سنت کے راستے "

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے